सरकारसँग निजी क्षेत्र आशावादीः अध्यक्ष श्रेष्ठ

नेपाल उद्योग वाणिज्य महासंघका नवनिर्वाचित अध्यक्ष अञ्जन श्रेष्ठले वर्तमान सरकारप्रति निजी क्षेत्रको संशय बाँकी रहेपनि आर्थिक वर्ष २०८३/०८४ को बजेटमा गरिएका घोषणाले भने सरकार निजी क्षेत्रलाई साथ लिएर अगाडि बढ्नेमा आशावादी भएको बताएका छन्।

नवप्रवर्तन र युवामैत्री नीति बजेटका राम्रा पक्ष भएको पनि उनको भनाइ थियो। यद्यपि, उनले सम्पत्ति शुद्धीकरणको नाममा उद्योगी–व्यवसायीमाथि भएको धरपकडप्रति भने चिन्ता व्यक्त गरे। पोखरा उद्योग वाणिज्य संघले आयोजना गरेको स्वागत कार्यक्रममा अध्यक्ष श्रेष्ठले भने, ‘देशलाई अन्तर्राष्ट्रिय नियमनकारी निकाय फाइनान्सियल एक्सन टास्क फोर्सको चेतावनीपछि कालोसूचीबाट बाहिर निकाल्ने नाममा सरकारले निजी क्षेत्रमाथि धरपकड बढाएको बताउँदै छ। हामी जिम्मेवार हुनुपर्छ, हामी माथि पनि औंला ठड्याउने काम भइरहेको छ। तर राज्यले पहिला सुन्ने अनि थुन्ने प्रक्रिया अपनाउनु पर्छ। अरुलाई क्षमादान दिने राज्यले किन व्यवसायीको हितबारे सोच्दैन?’