२५० रुपियाँको खरिदमा १० लाखको उपहार, शिव कृष्ण जेनरल स्टोरका ग्राहकले जिते 'सरकारी चिठ्ठा'

काठमाडौं । आन्तरिक राजस्व विभागले सञ्चालन गर्दै आएको करदाता प्रोत्साहन उपहार कार्यक्रमअन्तर्गत साउन महिनाको पहिलो १५ दिनको बम्पर उपहार विजेता घोषणा गरेको छ। यसपटक शिव कृष्ण जेनरल स्टोरबाट २५० रुपियाँ बराबरको सामान खरिद गरी बीजक (भ्याट बिल) लिएका एक उपभोक्ताले १० लाख रुपियाँको बम्पर उपहार जित्न सफल भएका छन्।

विभागले विद्युतीय माध्यमबाट गरिएको गोला प्रथामार्फत विजेताको छनोट गरेको हो। करदातालाई खरिद गर्दा अनिवार्य रूपमा कर बीजक लिन प्रोत्साहन गर्ने उद्देश्यले यो कार्यक्रम सञ्चालन हुँदै आएको छ । प्रत्येक गोला प्रथामा कर बीजक लिएका उपभोक्तामध्येबाट विजेता छनोट गरिन्छ। विभागका अनुसार यस कार्यक्रमले उपभोक्तामा खरिद गर्दा भ्याट बिल माग्ने बानीको विकास हुनुका साथै कर प्रणालीलाई पारदर्शी र प्रभावकारी बनाउन सहयोग पुग्ने अपेक्षा राखिएको छ ।