एभोकाडोकै लागि मेक्सिकोले गर्‍यो १५०० सैनिक परिचालन

मिचोआकान । मेक्सिकोले प्रमुख एभोकाडो उत्पादन क्षेत्र मिचोआकानमा १५०० भन्दा बढी सैनिक तथा नेसनल गार्डका सुरक्षाकर्मी परिचालन गरेको छ । अमेरिकाले सुरक्षा जोखिम देखाउँदै मिचोआकानबाट एभोकाडो निर्यातका लागि आवश्यक निरीक्षण अस्थायी रूपमा रोकेपछि मेक्सिकोले यस क्षेत्रको सुरक्षा व्यवस्था कडा बनाएको हो ।

अमेरिकी कृषि विभाग (यूएसडीए)का अधिकारीले निर्यातअघि एभोकाडोको अनिवार्य निरीक्षण गर्ने गर्छन् । ती निरीक्षण रोकिएपछि मिचोआकानबाट अमेरिकी बजारतर्फ नयाँ एभोकाडोको नयाँ लट पठाउन समस्या उत्पन्न भएको छ । अमेरिकाले अगस्ट ५ मा मिचोआकानमा अमेरिकीका लागि खतरा रहेको भन्दै सरकारी गतिविधि अस्थायी रूपमा रोकेको थियो ।