अन्नपूर्णमा लेक लागेका बिरामीको उपचार गर्ने जनशक्ति तयार

म्याग्दी । म्याग्दीको अन्नपूर्ण गाउँपालिकाका पर्यटकीयस्थलमा लेक लाग्ने (अक्सिजनको कमी) ले बिरामी परेका पर्यटकको प्राथमिक उपचार गर्ने जनशक्ति तयार पारिएको छ । भौगोलिक रूपमा विकट र दुर्गम हिमाली क्षेत्रको पदयात्रा, भ्रमणमा आउने पर्यटक र स्थानीयलाई अक्सिजनको कमीका कारण स्वास्थ्यमा समस्या आउँदा प्राथमिक र घरेलु विधिबाट उपचार गर्ने तरिकासम्बन्धी तालिम दिएर जनशक्ति तयार पारिएको हो ।

अन्नपूर्ण गाउँपालिकाका स्वास्थ्य शाखाका प्रमुख समुन्द्र बरुवालले उच्च पहाडी र हिमाली क्षेत्रमा पर्ने ४, ५, ६, ७ र ८ नम्बर वडामा रहेका स्वास्थ्य संस्थाका स्वास्थ्यकर्मी र पर्यटकीयस्थलका होटल व्यवसायीलाई आधारभूत तालिम प्रदान गरिएको जानकारी दिए ।