४४ लाख बराबरको सामग्रीसहित दुई भारतीय पक्राउ

बर्दियामा भन्सार छली ल्याएको सामानसहित दुई भारतीय नागरिकलाई प्रहरीले पक्राउ गरेको छ । प्रहरीले अवैधरुपमा भारतबाट ल्याउँदै गरेको तीन हजार सातसय ९० दर्जन काँचो केरासहित दुई पिकअप भ्यान र एक मोटरसाइकल पक्राउ गरेको हो ।

सामान ल्याउँदै गरेका भारत बहराइच जिल्ला फकलपुरका २० वर्षिय कलिम खान र २२ वर्षिय रिजवान अन्सारीलाई पक्राउ गरेको जिल्ला प्रहरी कार्यालयका सूचना अधिकारी रेशम बोहराले बताउनुभयो ।

उहाँले मधुवन नगरपालिका वडा ८ मा रहेको गोदामबाट भारतबाट अवैध भन्सार छली ल्याएर लुकाएर राखिएको किराना सामानरू समेत फेला परेको बताउनुभयो ।

प्रहरीले केरा ओसार पसारमा संलग्न भे १ च ३५८० र भे १ च ९१५९ नम्बरको दुईवटा पिकअप भ्यान र भे १२ प ९९२१ नम्बरको पल्सर मोटरसाइकल नियन्त्रणमा लिएको छ ।

नियन्त्रणमा लिएको सवारी साधन, केरा र किराना सामानको अनुमानित मूल्य ४४ लाख ४४ हजार दुईसय ६० रुपियाँ बराबरको सामान राजापुर भन्सार कार्यालय गुलरिया बर्दियामा पठाइएको सूचना अधिकारी बोहराले बताउनुभयो ।

लुम्बिनी प्रदेश प्रहरी कार्यालय दाङबाट खटिएको सादा पोषाकको प्रहरी, जिल्ला प्रहरी कार्यालयको प्रहरी र इलाका प्रहरी कार्यालय ढोढरीबाट खटिएको प्रहरी टोलीले उक्त सामान पक्राउ गरेको हो ।