दुई जिल्लाको बजार अनुगमन गर्ने कार्यालयमा एक जना मात्रै कर्मचारी

सर्लाही सदरमुकाम मलङ्गवामा रहेको खाद्य प्रविधि तथा गुण नियन्त्रण डिभिजन कार्यालयले सर्लाही र रौतहट गरी दुई जिल्लाको कार्यक्षेत्र हेर्दै आएको छ। तर, आश्चर्यको विषय, दुई जिल्लाको जिम्मेवारी सम्हाल्ने यस कार्यालयमा एक जना मात्रै कर्मचारी कार्यरत छन्। उनी पनि निमित्त कार्यालय प्रमुख हुन्।

नायब सुब्बा दिनेश ढुङ्गाना खाद्य प्रविधि तथा गुण नियन्त्रण डिभिजन कार्यालय मलङ्गवामा निमित्त कार्यालय प्रमुखका रूपमा एक्लै काम गरिरहनुभएको छ। उहाँलाई सहयोग गर्न करारमा नियुक्त एक जना कार्यालय सहयोगी दिलबहादुर चौधरी मात्रै हुनुहुन्छ।