महँगो फुटबल जर्सीभित्रको श्रम शोषण: श्रमिक भन्छन्-‘यी प्रत्येक जर्सीमा हाम्रो पसिना छ’

कम्बोडिया । विश्वका चर्चित फुटबल क्लबका आधिकारिक जर्सी उत्पादन गर्ने कामदारले प्रतिघण्टा एक पाउन्डभन्दा कम आधारभूत ज्याला पाउने गरेको खुलासा भएको छ । बीबीसी स्पोर्टको अनुसन्धानले कम्बोडियाका दुई कारखानामा कामदारले न्यून ज्याला, अत्यधिक गर्मी र उत्पादनको दबाबबीच काम गर्नुपरेको देखाएको हो ।

आर्सनल, लिभरपुल, सेल्टिक र रियल म्याड्रिडजस्ता क्लबका जर्सी उत्पादन हुने कारखानामा कामदारको अवस्था दयनीय रहेको अनुसन्धानले देखाएको छ । दैनिक गुजारा चलाउनसमेत कठिन हुने ज्याला पाउने उनीहरूले दिनमा ७०० वटासम्म कपडा उत्पादन गर्नुपर्ने दबाब झेल्छन् ।