बैंकबाटै सेयर कारोबार र बिमा सेवा दिने तयारी, अध्ययन गर्न समिति गठन

काठमाडौं – अर्थ मन्त्रालयले बैंकका शाखामार्फत सेयर कारोबार, बिमा तथा लगानी व्यवस्थापन सेवा उपलब्ध गराउने सम्भाव्यताबारे अध्ययन गर्न समिति गठन गरेको छ । ग्रामीण क्षेत्रका सर्वसाधारणलाई समेत सहज रूपमा वित्तीय सेवा उपलब्ध गराउने उद्देश्यले मन्त्रालयले राष्ट्रिय योजना आयोगका पूर्वसल्लाहकार डा. सञ्जय आचार्यको संयोजकत्वमा समिति गठन गरेको हो ।

मन्त्रिपरिषद्बाट स्वीकृत पाँचवर्षे ‘वित्तीय क्षेत्र विकास रणनीति’ कार्यान्वयन गर्ने क्रममा अर्थमन्त्रीस्तरीय निर्णयबाट समिति गठन गरिएको हो । अर्थमन्त्रीको नेतृत्वमा बिहीबार बसेको वित्तीय क्षेत्र उच्चस्तरीय समन्वय समिति बैठकमा यसबारे जानकारी गराइएको थियो ।