पूर्वी कंगोमा शान्ति बहालीका लागि अफ्रिकी युनियनको जोड, युद्धविराम पालना गर्न विद्रोहीलाई आग्रह

अफ्रिकी युनियन (एयू) को सहजकर्ता टोलीले पूर्वी प्रजातान्त्रिक गणतन्त्र कंगो (डीआरसी) मा जारी द्वन्द्व अन्त्यका लागि युद्धविरामको पूर्ण पालना र कुटनीतिक वार्तालाई निरन्तरता दिन आग्रह गरेको छ । एम २३ विद्रोही समूहको नियन्त्रणमा रहेको प्रमुख शहर गोमामा भएको उच्चस्तरीय परामर्शपछि टोलीले हिंसा रोक्न र शान्ति प्रक्रियालाई तार्किक निष्कर्षमा पु¥याउन सम्बन्धित पक्षहरूलाई आह्वान गरेको हो । इथियोपियाकी पूर्वराष्ट्रपति साले–वर्क जेवदेको नेतृत्वमा रहेको टोलीमा केन्याका पूर्वराष्ट्रपति उहुरु केन्याटा र बोत्स्वानाका पूर्वराष्ट्रपति मोकग्वेत्सी मासिसी सहभागी थिए । टोलीले संयुक्त राष्ट्रसंघीय शान्ति मिसन (मोनुस्को), मानवीय सहायता नियोगहरू र विद्रोही समूह एम२३ का प्रतिनिधिहरूसँग विस्तृत छलफल गरेको थियो । सन् २०२५ को मार्चदेखि कतारको मध्यस्थतामा दोहा शान्ति प्रक्रिया अन्तर्गत कंगो सरकार र विद्रोही समूहबीच वार्ता जारी छ । यस प्रक्रियाले जुलाईमा सिद्धान्तहरूको घोषणापत्र र नोभेम्बरमा एउटा विस्तृत ढाँचा सम्झौतामा हस्ताक्षर गर्न दुवै पक्षलाई सहमत गराएको थियो । सम्झौतामा विश्वासको वातावरण निर्माण गर्ने, चरणवद्ध रूपमा स्थिरीकरण गर्ने र द्वन्द्वका मूल कारणहरू सम्बोधन गर्ने प्रतिबद्धता गरिएको छ । यसैबीच, कंगो रिभर एलायन्स (एएफसी) का नेता कोर्नेइल नाङ्गाले मध्यस्थकर्ताहरूलाई केवल औपचारिक विज्ञप्तिमा सीमित नभई व्यावहारिक र निष्पक्ष भुमिका खेल्न आग्रह गरेका छन् । नाङ्गाले शान्ति प्रक्रियामा अवरोध पु¥याउने पक्षहरूलाई पहिचान गरी कारबाही गर्नुपर्नेमा जोड दिएका छन् । विज्ञप्तिमा एयू टोलीले नागरिकको सुरक्षा र मानवीय सहायताको निर्बाध पहुँचको सुनिश्चिततालाई उच्च प्राथमिकतामा राखेको जनाएको छ । जनवरी २०२५ यता उत्तर र दक्षिण किभु प्रान्तमा एम २३ विद्रोहीले आक्रामक गतिविधि बढाउँदै गोमा र बुकाभु जस्ता रणनीतिक सहरहरू आफ्नो नियन्त्रणमा लिएका छन् । एयूको टोलीले यस परामर्शको नतिजालाई मध्यस्थकर्ता र कंगो सरकारसमक्ष प्रश्तुत गर्ने जनाएको छ ।

Share this: