हाइटीमा हिंसाको भयावह अवस्था, १६ हजारभन्दा बढी मानिस मारिए

काठमाडौँ। संयुक्त राष्ट्र सङ्घले सन् २०२२ को सुरुदेखि हाइटीमा सशस्त्र हिंसाका कारण १६ हजारभन्दा बढी मानिस मारिएको जनाउँदै अझै योभन्दा खराब अवस्था आउन सक्ने चेतावनी दिएको छ। संयुक्त राष्ट्रका अधिकार प्रमुख भोल्कर टर्कले मार्च महिनादेखि हिंसा तीव्र भएको र हाइटीमा मानव अधिकारको अवस्था बिकराल बन्नुका साथै दुव्र्यवहार बढेको बताएका छन्।

गरिबी र लामो समयदेखिको राजनीतिक अस्थिरताबाट ग्रस्त देश हाइटी हिंसात्मक आपराधिक गिरोहबाट पीडित छ। यी गिरोहले हत्या, बलात्कार, लुटपाट र अपहरणजस्ता गतिविधि गर्दै आएका छन्। टर्कले जेनेभामा संयुक्त राष्ट्र मानव अधिकार परिषद्लाई सम्बोधन गर्दै सन् २०२२ जनवरी १ देखि गिरोह र सम्बन्धित हिंसाको निगरानी सुरु गरिएको बताएका थिए। यस अवधिमा उल्लेखित सङ्ख्याभन्दा बढी मानिस मारिएका छन् भने करिब सात हजार मानिसहरू घाइते भएका छन्।