स्टारलिङ्कबारे मस्कको आरोपपछि भारतले भन्यो- 'नियम सबैका लागि समान'

काठमाडौं । भारत सरकारले एलन मस्कको स्याटेलाइट इन्टरनेट कम्पनी स्टारलिङ्कलाई देशमा सञ्चालन हुन नदिएको आरोप अस्वीकार गरेको छ । दूरसञ्चार सेवासम्बन्धी सरकारी नियम सबै कम्पनीका लागि समान रहेको उल्लेख गर्दै भारतले सेवा सञ्चालनका लागि आवश्यक सुरक्षा मूल्याङ्कन पूरा गर्नुपर्ने स्पष्ट पारेको छ ।

मस्कले बुधबार सामाजिक सञ्जाल एक्समार्फत भारतमा स्टारलिङ्कको प्रवेश केही ‘कुलीन वर्ग’ले आफ्नो एकाधिकार जोगाउन अवरुद्ध गरेको आरोप लगाएका थिए । उनले भारतीय जनतालाई एकाधिकारको अवस्थामा राख्न आफ्नो कम्पनीलाई रोकिएको दाबी गर्दै यस्तो कार्यलाई भारतका जनताविरुद्धको अपराध समेत बताएका थिए ।