आफूले आफूलाई चिन्नुको महत्व

जे देखिन्छ त्यो आफ्नो हुँदैन अनि जे आफ्नो हो त्यसलाई देख्न सकिँदैन । संसारमा सबैभन्दा महत्त्वपूर्ण कुरा यो हो । केही वर्षअघि संसारभरि नै कोरोना भाइरसको प्रभावका कारण मानिसले धेरै नै दुःख व्यहोर्नुपरेको थियो । तथापि, त्यस्तो परिस्थितिका बीचमा पनि कुनै यस्तो कुरा होला त जसलाई भन्न सकियोस्, ‘योचाहिँ सत्य हो !’ जसलाई भन्न सकियोस्, ‘योचाहिँ दिव्य चीज हो !’ जसलाई भन्न सकियोस्, ‘योचाहिँ आनन्ददायक छ !’ त्यस्तो समयमा पनि मानिसका लागि उपलब्ध हुने कुनै यस्तो चीज छ ? त्यो समयमा त मानिसहरूमा आशाको भण्डार नै रहेन । केवल निराशा मात्र थियो ।

कतिपय मानिसका लागि कारोना भाइरस आउनु, त्यसले प्रभाव पारिरहनु साँच्चै रावणभन्दा कम थिएन । कतिपय मानिसहरूका आमाबुवा, भाइबहिनीलगायतले त्यही रोगका कारण मृत्युवरण गर्नुपरेको थियो । उनीहरूले राम्रोसँग अन्तिम बिदाइ पनि गर्न पाएनन् । उनीहरूका आमाबुवा अस्पतालमा बिरामी अवस्थामा भएका बेलामा उनीहरूलाई स्याहारसुसार गर्न पनि सकेनन् उनीहरूले ।