सूर्यविनायकका महिलाको अनुभव: कमाउन थालेपछि घरझगडामा कमी आयो

भक्तपुरको सूर्यविनायक नगरपालिका–६ का महिलाहरूले आफैँले कमाउन थालेपछि घरझगडामा कमी आएको अनुभव सुनाएका छन्। उनीहरूका अनुसार आफ्नै आम्दानी हुन थालेपछि परिवारको खर्चमा योगदान पुर्‍याउन र बचत गर्ने क्षमता विकास गर्न सहयोग पुगेको छ। यसले श्रीमान्–श्रीमतीबीचको घरायसी विवादसमेत कम गर्न मद्दत गरेको उनीहरूको भनाइ छ।

सूर्यविनायक नगरपालिका–६ मा सीमान्तकृत महिला तथा बालबालिकाको सशक्तीकरण, आर्थिक आत्मनिर्भरता र न्यायमा पहुँच अभिवृद्धिका लागि महिला जागरण तथा विकास केन्द्रले सहयोग गरेपछि महिलाहरूले विभिन्न काम गरेर आम्दानी गर्न थालेका हुन्। परियोजनाको सहयोगपछि साना तथा ठूला व्यवसाय सुरु गरी आम्दानी गर्न सफल भएको उनीहरूले बताएका छन्।