विश्वप्रकाशको प्रस्ताव- प्रधानमन्त्रीका उम्मेदवारबीच खुलामञ्चमा बहस गरौँ

पोखरा। नेपाली कांग्रेसका उपसभापति विश्वप्रकाश शर्माले प्रतिनिधिसभा निर्वाचनपछि बन्ने सरकारमा प्रधानमन्त्री घोषणा गरिएकाबीच काठमाडौँको खुलामञ्चमा बहसको प्रस्ताव गरेका छन्।

उनले फागु पूर्णिमाका दिन सँगै होली खेल्न र निर्वाचनपछि बन्ने संसद्को पाँचवर्षे कार्यकालमा गर्नुपर्ने कामका एजेन्डामा बहस गर्ने प्रस्ताव गरे। कास्कीको पोखरामा आयोजना गरेको चुनावी सभामा शर्माले त्यस्तो प्रस्ताव गरेका हुन्। “फागुन १८ गते होली छ। त्यो होलीमा प्रधानमन्त्रीका उम्मेदवारबीच खुलामञ्चमा सार्वजनिक बहस गरौँ‚” उपसभापति शर्माले सोधे‚ “सँगै होली खेलौँ। यो कांग्रेसको प्रस्ताव छ। अरू दल राजी हुनुहुन्छ?”