म्याग्दीका सबै उम्मेदवारले खोले चुनावी बैंक खाता

म्याग्दी । आसन्न प्रतिनिधिसभा सदस्यको निर्वाचनमा म्याग्दीका सबै उम्मेदवारले छुट्टै बैंक खाता सञ्चालनमा ल्याएका छन् । एक निर्वाचन क्षेत्र रहेको जिल्लामा चुनावी प्रतिस्पर्धामा रहेका सबै १२ उम्मेदवारहरूले चुनावी प्रयोजनका लागि बैंक खाता सञ्चालनमा ल्याएका मुख्य निर्वाचन अधिकृतको कार्यालयले जनाएको छ ।

निर्वाचन आयोगले चुनावी खर्चलाई पारदर्शी र मितव्ययी बनाउने उद्देश्यले गरेको निर्णय यहाँका सबै उम्मेदवारहरूले कार्यान्वयन गरेका मुख्य निर्वाचन अधिकृत सूर्यबहादुर थापाले जानकारी दिए । उम्मेदवारको खर्च, आम्दानी मुख्य निर्वाचन अधिकृतको कार्यालयको सिफारिसमा खोलिएको खाताबाट गर्नुपर्ने र त्यसको अनुगमन कोष तथा लेखा नियन्त्रणको कार्यालयले गर्ने उनले बताए ।