भारतीय सांसदमाथि पैसा लिएर संसद्मा प्रश्न सोधेको आरोप

नयाँदिल्ली — भारतीय पार्टी तृणमूल कंग्रेसकी लोकसभा सांसद महुआ मोइत्रामाथि पैसा लिएर संसद्मा प्रश्न गरेको आरोप लागेको छ । संसद्को एथिक्स कमिटीले बिहीबार उनलाई लोकसभाबाट निष्काशनको सिफारिस गरेको छ ।

केन्द्रमा विपक्षी पार्टी तृणमूल कंग्रेसकी सांसद मोइत्रा प्रखर वक्ताका रूपमा चिनिन्छन् । उनले लोकसभामा भारतीय जनता पार्टी (भाजपा) नेतृत्वको सरकार र प्रधानमन्त्री नरेन्द्र मोदीको निरन्तर आलोचना गर्दै आएकी छन् । उद्योगपति गौतम अडानीसँग सरकारको सम्बन्धलाई लिएर पनि निरन्तर प्रश्न उठाउने सांसदमध्ये मोइत्रा पनि एक हुन् । भाजपाले यतिबेला उनीमाथि अर्को उद्योगपतिसँग पैसा लिएर अडानीसँग सम्बन्धित प्रश्न लोकसभामा उठाएको आरोप लगाएको छ । भाजपा सांसद निशिकांत दुबेले १५ अक्टोबरमा उक्त आरोप लगाउँदै मोइत्रामाथि कारबाही गर्न लोकसभा स्पिकर ओम बिरलालाई पत्राचार गरेका थिए । स्पिकरले त्यसमाथि अनुसन्धान गरी आवश्यक सिफारिसको जिम्मा एथिक्स कमिटीलाई दिएका थिए ।