आइसिसी टी ट्वान्टी विश्वकप: इतिहास बनाउने खेलको प्रतीक्षा

खेलकुदमा तुलनात्मक रूपमा कमजोर टोलीले शक्ति राष्ट्रलाई हराउँदा त्यो सनसनीपूर्ण नतिजा या नयाँ इतिहास बन्ने गर्छ। त्यस किमिसका नतिजाले कुनै पनि प्रतियोगितालाई रोमाञ्चक पनि बनाउँछ। फुटबल, क्रिकेट या विश्वकै पनि लोकप्रिय खेलका प्रतियोगितामा यस्ता नतिजाहरू आइरहन्छन्। जसको पर्खाइमा खेल समर्थक पनि हुने गर्दछन्।

भारत र श्रीलंकामा अहिले आइसिसी टी ट्वान्टी विश्वकप भइरहेको छ। पहिलो चरणको खेल सकिन लाग्दा क्रिकेट समर्थकहरू पनि यस्तै किसिमका नतिजाको पखाईमा छन्। विश्वकपमा २० राष्ट्रले प्रतिस्पर्धा गरिरहेका छन्। आइसिसीले क्रिकेटको लोकप्रियता बढाउने उद्देश्यले छोटो फरम्याटको विश्वकपमा गत संस्करणदेखि १६ राष्ट्रबाट २० टोलीसम्मको सहभागिता बढाएको हो। यसले गर्दा धेरै एसोसिएट राष्ट्रको विश्वकप खेल्ने सपना पूरा भयो। अहिले नेपालसहित ९ राष्ट्रले दसौं संस्करणको विश्वकप खेलिरहेका छन्। जहाँ उनीहरूले नयाँ छाप छाड्ने या इतिहास बनाउने आशा राखेका छन् तर अहिलेसम्म सुखद नतिजा आउन सकेको छैन। ९ राष्ट्रले नै समूहको पहिलो खेल खेले पनि अप्रत्याशित नतिजा आउन सकेको छैन।