नेकपा प्रतिबद्धता ‘एमालेपथ’मा

नेपाली कम्युनिस्ट पार्टी (नेकपा) ले आसन्न प्रतिनिधिसभाको निर्वाचनका लागि ल्याएको चुनावी प्रतिबद्धतापत्र एमालेपथमा हिँडेको देखिएको छ। केरुङ-काठमाडौं, काठमाडौं–पोखरा र काठमाडौं–लुम्बिनी रेलमार्गको निर्माण प्रक्रिया अगाडि बढाउने, पूर्व–पश्चिम रेलमार्ग निर्माण र काठमाडौंमा मेट्रोरेल तथा मोनोरेल निर्माण प्रक्रिया अगाडि बढाउनेजस्ता योजनाले एमालेपथ पछ्याएको देखिन्छ। ‘आगामी दशक कृषि दशक’ यसअघिकै योजनाको निरन्तरता हो। २०७९ सालमा तत्कालीन नेकपा माओवादी केन्द्रले यो योजना ल्याएको थियो। यही माओवादी केन्द्रको अगुवाइमा नेकपा एकीकृत समाजवादीलगायत दलहरू मिलेर नेकपा बनेको हो।

नेकपाको केन्द्रीय कार्यालय पेरिसडाँडामा मंगलबार अपराह्न आयोजित कार्यक्रममा संयोजक पुष्पकमल दाहालले सार्वजनिक गरेको प्रतिबद्धतापत्रमा अघिल्लो निर्वाचनताका सार्वजनिक भएका विषय र योजना धेरै दोहोर्‍याएका छन्। यसपटक ‘सुशासन र रोजगारी समाजवादको तयारी, राष्ट्रियता र लोकतन्त्रको रक्षा हाम्रो जिम्मेवारी’ भन्ने नारा अगाडि सारेर नयाँ बनाउने कोसिस भने नेकपाले गरेको छ। प्रतिबद्धतापत्रमा राजनीतिक स्थिरता, सुशासन, नयाँ चरणको आर्थिक सुधार र सामाजिक न्यायहितको समृद्धिलाई प्राथमिकतामा राखिएको छ। त्यसका लागि नेकपाले ‘स्वाधीन र समृद्ध नेपाल निर्माणको मार्गचित्र’ भन्ने योजना अघि सारेको छ।