विशेष अदालतको ‘विशेष उपलब्धि’ : ६ महिना पुराना सबै मुद्दा फर्स्योट

काठमाडौँ — दर्ता भएको ६ महिनाभित्र मुद्दा किनारा लगाउनुपर्ने विशेष अदालत ऐनमा उल्लेख भएअनुसार ६ महिना नाघेका सबै मुद्दा फर्स्योट भएका छन् । यसअघि भने त्यसको पूर्ण कार्यान्वयन हुन सकेको थिएन । नेपालको न्यायपालिकामा ६ महिना पुराना मुद्दा किनारा लागेको यो नै पहिलो घटना भएको भन्दै विशेष अदालतले यसलाई ‘गर्व गर्न लायक’ उपलब्धि भनेको छ ।

‘अदालतमा मुद्दा वर्षौं अल्झिन्छ भन्ने आम बुझाइ छ र मुद्दाहरु लम्बिने गरेका पनि छन्,’ विशेष अदालतका अध्यक्ष टेकनारायण कुँवरले भने, ‘तर, हामीले वर्षौंदेखि थुप्रिएका सबै मुद्दाको सफलतापूर्वक छिनोफानो गर्न भ्याएका छौं, त्यसैले यो विशेषको मात्रै नभएर समग्र न्यायालयकै विशेष र ऐतिहासिक उपलब्धि हो ।’