मिसिसिपीको किनारदेखि अमेरिकी घरआँगनसम्म

वासिङ्टनको कार्यक्रम समापन गरेपछि हामी मिनियापोलिसतर्फ प्रस्थान गर्ने तयारीमा लाग्यौँ। त्यसका लागि हामी बसमार्फत भर्जिनियास्थित रोनाल्ड रेगन वासिङ्टन नेशनल एयरपोर्टतर्फ लाग्यौँ। बसको सिधा यात्रा करिब ३०-४० मिनेटमै पूरा हुने भए पनि हाम्रो यात्राको उद्देश्य केवल विमानस्थल पुग्नु मात्र थिएन, बाटोभरि राजधानी वरपरका विभिन्न स्थानहरूको अवलोकन गर्दै जाने गरी कार्यक्रम तय गरिएकाले हामीलाई विमानस्थल पुग्न झण्डै दुई घण्टा लाग्यो।

वासिङ्टन र भर्जिनियालाई पोटोम्याक नदीले छुट्याउँछ। त्यो नदी पार गरेपछि राजधानीलाई पछाडि छोड्दै अर्को राज्यमा प्रवेश गरेको अनुभूति आफैमा विशेष थियो। करिब दुई घण्टा चालीस मिनेटको हवाई यात्रापछि हामी मिनेसोटा राज्यको मिनियापोलिस-सेन्ट पल अन्तर्राष्ट्रिय विमानस्थलमा अवतरण गर्यौँ। त्यहाँबाट करिब ११ माइलको बसयात्रा गरेर सहरको केन्द्रमा रहेको होटल पुग्दा साँझ परिसकेको थियो।