अत्यधिक बिदा स्वीकृत गरेपछि सल्यान र जाजरकोटका गुल्मपति फिर्ता बाेलाइए

काठमाडौँ । सशस्त्र प्रहरी बल नेपालले अत्यधिक संख्यामा कर्मचारीलाई बिदा स्वीकृत गरी सङ्गठनात्मक अनुशासनमा कमजोरी देखाएको पुष्टि भएपछि सल्यान र जाजरकोटस्थित गुल्मका कमाण्डर(डीएसपी)लाई कमाण्डबाट फिर्ता बोलाएको छ।

सशस्त्र प्रहरी नायव महानिरीक्षक तथा प्रवक्ता विष्णु प्रसाद भट्टका अनुसार सशस्त्र प्रहरी महानिरीक्षकको कार्यालयमा ती दुई गुल्ममा कार्यरत कर्मचारीहरूलाई अस्वाभाविक रूपमा धेरै संख्यामा बिदा दिइएको सम्बन्धमा उजुरी परेपछि प्रधान कार्यालयले वरिष्ठ उपरीक्षक (एसएसपी) को नेतृत्वमा छानबिन टोली खटाएको थियो।