‘महिनावारी विभेद अन्त्यका लागि सचेतना आवश्यक’

कालिकोटको रास्कोट नगरपालिकाकी किशोरी पूजा बमका बाजे (हजुरबुवा) धामी हुन्। घरमा महिनावारी हुँदा उनी दुध दही खान पाउँदिननँ। उनको घरमै ‘देउता’ भएकाले महिनावारी हुँदा अनेक विभेद व्यहोर्नुपर्छ।

पछिल्लो समय उनी महिनावारीका बेला आफ्नो घरमा हुँदिनन्। ‘मेरो घरमा बाजे पुजारी हुनुहुन्छ, देउताको थान (मन्दिर) पनि घरमै छ,’ उनले भनिन्, ‘छाउ बार्नका लागि महिनावारी हुँदा मामा घरमा जाने गरेकी छु।’ अघिल्लो वर्ष उनको छिमेककी दिदी महिनावारी हुँदा गोठमा सुतेकी थिइन्। ‘सर्प आएर दिदीको खुट्टामा बेरियो,’ उनले भनिन्, ‘यस्ता घटनाहरू गाउँतिर भइरहेका हुन्छन्।’