सुदूरपश्चिम सरकारको आरोप : फाप्ला खेल मैदानको योजना संघ सरकारले खोस्यो

धनगढी : एक हप्ताअघि मात्रै धनगढीको फाप्ला मैदानमै पुगेका संघीय युवा तथा खेलकुदमन्त्री महेश्वरजंग गहतराजले धनगढीको फाप्लामा संयुक्त लगानीमा अन्तरराष्ट्रिय क्रिकेट मैदान र खेलग्राम निर्माण थालिने बताएका थिए। ‘फाप्लामा अन्तरराष्ट्रिय क्रिकेट मैदान निर्माणको निर्णय गरेका छौं,’ उनले भनेका थिए, ‘सुदूरपश्चिम प्रदेश सरकारले फाइल अगाडि बढाएको हो। प्रदेश सरकारको कामबाट नै हामीले निर्णय गर्न पाएका हौं। निर्माणमा १५ अर्ब खर्च हुने देखिएको छ।’

प्रदेश सरकारले मात्र फाप्लाको योजना कार्यान्वयन गर्न नसक्ने तर्क उनको थियो। संघीय सरकारले नै स्थानीय तह, प्रदेश सरकार, निजी क्षेत्र र अन्तरराष्ट्रिय सहयोगमा क्रिकेट मैदान निर्माण गर्ने उनको दाबी थियो। ‘चालू आवमा बजेटको व्यवस्था हुने देखिएको छैन,’ मन्त्री गहतराजले भनेका थिए, ‘आगामी आवमा ठेक्का सम्झौता गर्छौं। स्थानीयको सहयोग र सक्रियता चाहिन्छ।’