झोर महाँकाल विद्यालयमा तामाङ भाषा पढाइ सुरु

काठमाडौं । टोखा नगरपालिका–१, झोरस्थित महाँकाल माध्यमिक विद्यालयमा तामाङ भाषा पठनपाठन सुरु गरिएको छ। मातृभाषा, लिपि, संस्कार र संस्कृतिको संरक्षण तथा नयाँ पुस्तामा भाषाप्रतिको रुचि बढाउने उद्देश्यले शुक्रबार आयोजित कार्यक्रममा शुभकामना आदानप्रदानसँगै विद्यार्थीलाई विद्यालय झोलासमेत वितरण गरिएको छ।

विद्यालय व्यवस्थापन समितिका अध्यक्ष महेश्वर अधिकारीको अध्यक्षतामा भएको कार्यक्रममा टोखा नगरपालिकाका प्रमुख प्रकाश अधिकारी प्रमुख अतिथि थिए। कार्यक्रममा उपप्रमुख मुरारी तामाङ, वडा नं. ७ का अध्यक्ष नरोत्तम राना, नेपाल तामाङ घेदुङका संघीय उपमहासचिव एवं भाषा समन्वय प्रमुख बिलाम मुक्तान, घेदुङका ऊर्जा तथा वातावरण विभाग प्रमुख शशिकर लामा, प्रदेश प्रतिनिधि, पालिका अध्यक्ष, स्थानीय समाजसेवी, शिक्षक, अभिभावक र विद्यार्थी सहभागी थिए।