वीरगन्ज पुगेर गृहमन्त्री लेखकले भने ‘महामारीको रोकथामका लागि नेपाली सेनालाई पनि खटाइन्छ’

वीरगन्ज । गृहमन्त्री रमेश लेखकले पर्सा जिल्लामा फैलिएको हैजा महामारी नियन्त्रणका लागि नेपाली सेनासहित तीनै सुरक्षा निकायका जनशक्ति खटाइने बताएका छन्। शनिबार अबेर राति वीरगन्जको नारायणी अस्पतालमा हैजा सङ्क्रमित बिरामी भेटघाटपश्चात् आयोजित ब्रिफिङ कार्यक्रममा उनले महामारी नियन्त्रणका लागि सरकार गम्भीर रहेको स्पष्ट पारेका हुन्।

गृहमन्त्री लेखकका अनुसार जिल्ला सुरक्षा समितिको निर्णयअनुसार नेपाल प्रहरी, सशस्त्र प्रहरी र नेपाली सेनाबाट मेडिकल फिल्डका जनशक्ति पठाउने तयारी भएको छ। उनले अस्पताल प्रशासनलाई आवश्यक परे तुरुन्तै थप जनशक्ति र औषधि उपलब्ध गराइने पनि आश्वासन दिए।