भारतमा कक्रोच जनता पार्टीको हरिबिजोग, प्लेनबाटै पक्राउ परे अभिजीत दिपके !

कक्रोच जनता पार्टीका संस्थापक अभिजीत दिपकेलाई दिल्ली प्रहरीले विमानबाटै पक्राउ गरेको छ। मुम्बईबाट उडान भरेर दिल्ली विमानस्थलमा अवतरण गर्नासाथ प्रहरी टोली विमानभित्रै प्रवेश गरी दिपकेसहित पार्टीका अन्य नेताहरू आशुतोष रान्का र सौरभ दासलाई नियन्त्रणमा लिएको हो। उनीहरू मुख्य निर्वाचन आयुक्त ज्ञानेश कुमारको राजीनामा र एसआईआर (SIR) को निलम्बनको माग गर्दै जन्तर मन्तरमा आयोजना गरिएको विरोध प्रदर्शनमा सहभागी हुन दिल्ली पुगेका थिए।

पक्राउ पर्नुअघि दिपकेले प्रधानमन्त्री नरेन्द्र मोदी जनतासँग डराएको गम्भीर आरोप लगाएका छन्। उनले विरोध प्रदर्शन सुरु हुनुअगावै सरकारले हार स्वीकार गरिसकेको टिप्पणी गर्दै प्रदर्शनकारीहरूमाथि धरपकड र प्रतिबन्ध लगाउनु शक्तिको नभई डरको सङ्केत भएको बताएका छन्। दिल्लीमा ठूलो संख्यामा प्रहरी र सुरक्षाबल परिचालन गरेर शान्तिपूर्ण आन्दोलन दबाउन खोजिएको भन्दै उनले मोदी सरकारको तीव्र आलोचना गरे।