फर्केर हेर्दा ‘२०८१’ : पत्रकारका लागि नेतृत्व चुन्ने वर्ष

वीरगन्ज । आफ्ना संघ–संगठनको नयाँ नेतृत्व चुन्ने वर्षका रुपमा पत्रकारहरुको लागि ‘२०८१ साल’ निर्वाचनमय वर्षका रुपमा दरिएको छ । नेपाल पत्रकार महासंघको निर्वाचनसँगै यो वर्ष पार्टी निकट पत्रकारका पनि संघ–संगठनहरुको नयाँ नेतृत्व चुन्ने बर्षका रुपमा दरिएको हो ।

पत्रकारहरुको छाता संगठन नेपाल पत्रकार महासंघको निर्वाचन चौथो पटकसम्म स्थगित भई पाँचौं पटकको मितिमा गएको मंसिर २८ गते देशैभर निर्वाचन भयो । यो निर्वाचनले महासंघका जिल्ला, प्रदेश र केन्द्रसम्मको नेतृत्व चुनेको छ । झण्डै विधान नै मिचिने अवस्थामा महासंघको निर्वाचन सम्पन्न हुनु आफैमा महत्वपूर्ण रह्यो । अझ महासंघका निवर्तमान अध्यक्ष विपुल पोख्रेल र वरिष्ठ उपाध्यक्ष रमेश विष्ट सहित दुई–दुई जना नेतृत्वकर्ताले निर्वाचन गराउन नसकी राजीनामा दिएर जिम्मेवारी छाडेपछि अका उपाध्यक्ष बाला अधिकारीको नेतृत्वमा महासंघको निर्वाचन सम्पन्न भयो ।