छठका लागि सङ्लिँदै सिर्सिया

पर्सा — छठ पर्व नजिकिएसँगै सिर्सिया खोलाको पानी सङ्लिँदै गएको छ । खोलाको पानीमा अहिले कालो लेदो देखिँदैन । गत शनिबारदेखि खोलाको पानी सफा हुँदै गएको वीरगन्ज राधेमाई निवासी सामाजिक अभियन्ता प्रकाश थारु बताउँछन् ।

झन्डै २ दशकदेखि सिर्सिया खोलाको किनारको राधेमाई टोलका बासिन्दा रहेका थारुको यो खोलाको पानी छठ पर्वपछि पनि यसरी नै सङ्लो र प्रदूषणमुक्त रहोस् भन्ने चाहना छ । ‘मलाई मेरो जीवनकालमै यो खोलाको पानी सधैँभरकिा लागि यसरीनै कञ्चन र सङ्लो देख्ने चाहना छ,’ उनले भने, ‘खोलाको पानीको शुद्धता मात्र नभई अस्तित्व नै समाप्त पार्ने गरी खोलालाई प्रदूषित बनाउने काम अब सधैँभरका लागि बन्द गरिनु पर्छ ।’