बुढासुब्बा गोल्डकपः प्लानिङ ब्वाइज फाइनलमा

सुनसरी । धरानमा जारी २६औँ अन्तर्राष्ट्रिय आमन्त्रण बुढासुब्बा गोल्डकप फुटबल प्रतियोगितामा प्लानिङ ब्वाइज फुटबल क्लब फाइनलमा प्रवेश गरेको छ ।

धरान रङ्गशालामा बुधबार भएको खेलमा लालीगुराँस एसोसिएसन पोखरालाई २–१ गोल अन्तरले पराजित गर्दै प्लानिङ ब्वाइज फाइनलका प्रवेश गरेको हो । खेलको पहिलो समयको छैटौँ मिनेटमा लालीगुराँस फुटबल क्लबका खेलाडी सिकन्दर सिद्धिकीले पहिलो गोल गर्दै टोलीलाई अग्रता दिलाएका थिए । दोस्रो हाफको १४औँ मिनेटमा प्लानिङ ब्वाइजका खेलाडी विलियम एलेक्सले गोल गरेपछि खेल बराबरीमा पुगेको थियो । त्यसपछि दोस्रो हाफको ४१औँ मिनेटमा प्लानिङ ब्वाइजका खेलाडी प्रतापसिंह राईले थप गोल गर्दै जित सुनिश्चित गरेका हुन् ।