धुलिखेलमा ‘डी–टाउन बास्केटबल एकेडेमी’ स्थापना

काभ्रेपलान्चोक । धुलिखेल नगरमा खेलकुदको प्रवर्द्धन गर्ने उद्देश्यले डी–टाउन बास्केटबल एकेडेमी स्थापना गरिएको छ ।

एकेडेमीको धुलिखेल नगरका प्रमुख अशोक ब्याञ्जूले शुक्रबार प्रशिक्षित खेलाडीलाई बास्केटबल हस्तान्तरण गरी शुभारम्भ गरे । एकेडेमीमा करिब चार दर्जन खेलाडीले पहिलो चरणमा प्रशिक्षण लिने कार्यक्रम रहेको जनाइएको छ । एकेडेमीको शुभारम्भका अवसरमा नगर प्रमुख ब्याञ्जूले नगरका अन्य खेलसँगै बास्केटबलले औपचारिक रूपमा स्थापित हुने अवसर जुराएको जनाउँदै चालु आर्थिक वर्षभित्र नगरका विद्यालय हाताभित्र एक र बाहिर खुल्ला स्थानमा एक गरी दुई बास्केटबल कोर्ट निर्माण गर्ने गरी योजना बनाएको जानकारी दिए। उनले अब एकेडेमीमार्फत खेल क्षेत्रको संरक्षण र प्रवर्द्धन, खेलाडीको उत्पादन तथा क्षमता अभिवृद्धि र समग्र खेल क्षेत्रको पूर्वाधार निर्माणमा ध्यान केन्द्रित गर्ने बताए ।