धादिङ निर्वाचन क्षेत्र नं. १ मा चुनावी विवाद: आशिकाको आरोप पाण्डेद्वारा खण्डन

काठमाडौँ । आसन्न निर्वाचनको प्रचारप्रसारका क्रममा धादिङ क्षेत्र नम्बर १ मा उम्मेदवारहरूबिच आरोप–प्रत्यारोप सुरु भएको छ । राष्ट्रिय स्वतन्त्र पार्टीकी उम्मेदवार आशिका तामाङले नेपाली कम्युनिस्ट पार्टीका उम्मेदवार राजेन्द्र प्रसाद पाण्डेका कार्यकर्ताहरूले आफूमाथि दुर्व्यवहार र सवारीसाधन तोडफोड गरेको आरोप लगाएकी छिन् भने पाण्डेले उक्त आरोपको खण्डन गरेका छन् ।

उनले शनिबार सामाजिक सञ्जाल फेसबुकमार्फत पाण्डेका समर्थकहरूले आफ्नो प्रचार टोलीलाई लक्षित गरी अराजक गतिविधि गरेको दाबी गरेकी छिन् । उनले आफ्नो गाडी घेराउ गर्ने, गाडीभित्र रहेका सदस्यहरूलाई अश्लील गालीगलौज गर्ने, गाडीमा राखिएको पार्टीको झण्डा चोरी गर्ने र लात्तीले हानेर गाडी कुच्च्याउनुका साथै सिसा समेत फुटाइदिएको आरोप लगाएकी छिन् । उनले यस्ता अराजक गतिविधि गर्नेहरूलाई कानुनी कारबाही हुने कि नहुने भन्दै प्रश्न समेत गरेकी छिन् ।