स्यारखोला थुनिएर आयो बुढीगण्डकीमा बाढी

पोखरा । बुढिगण्डकी नदीमा आएको बाढी सुक्खा पहिरोका कारण आएको बताइएको छ । चुमनुब्री गाउँपालिकाको वडा नम्बर ६ स्थित खारोङ र उङजुलुङको बीचमा सुक्खा पहिरो खसेर स्यार खोला थुनिएपछि बुढीगण्डकी नदीमा बाढी आएको हो ।

थुनिएको खोला फुटेर आएको बाढीले नदी किनारका बस्तीहरूमा ठूलो विनाश निम्त्याएको छ । बाढी आएको ठाउँसम्म अहिले कोही पुगेका छैनन् । चुमनुब्री गाउँपालिकाका प्रमुख प्रशासकीय अधिकृत नारायणप्रसाद सापकोटाका अनुसार नदी थुनिँदा झन्डै २०० देखि ३०० मिटर माथिसम्म पानी र वाफको मुस्लो देखिएको थियो ।