पुस्तकालय समाजको समग्र विकासको केन्द्र हुनुपर्छ: सञ्चारमन्त्री गुरुङ

काठमाडौँ । सञ्चार तथा सूचना प्रविधिमन्त्री पृथ्वी सुब्बा गुरुङले पुस्तकालय केवल किताब भण्डारणस्थल मात्र नभई समाजको समग्र विकासको केन्द्र हुनुपर्ने बताएका छन् ।

शिक्षा, विज्ञान तथा प्रविधि मन्त्रालयले आज यहाँ आयोजना गरेको १८औँ पुस्तकालय दिवस २०८२ समारोहमा उनले बदलिँदो समयअनुसार पुस्तकालयको भूमिका पुनः परिभाषित गर्नुपर्ने आवश्यकता औँल्याए । मन्त्री गुरुङले प्राचीनकालदेखि नेपालको पुस्तकालय इतिहास रहेको स्मरण गर्दै १८६९ सालमा जारी ‘पुस्तक चिताइ तहबिल’ लालमोहरलाई पहिलो कानुनी पुस्तकालयको आधार मानिएको उल्लेख गरे ।