ड्रुक एयरले पोखरामा चार्टर उडान गर्ने

रोयल भुटान एइरलाइन्स ‘ड्रुक एयर’ले भुटानको पारोबाट पोखरामा अन्तर्राष्ट्रिय उडान गर्ने भएको छ । नियमनकारी निकाय नेपाल नागरिक उड्डयन प्राधिकरण (क्यान)ले ड्रुक एयरलाई २३ भदौका लागि पोखरा अन्तर्राष्ट्रिय विमानस्थलमा चार्टर उडान गर्न अनुमति दिएको छ ।

ड्रुक एयरको न्यारोबडी जहाज २३ भदौमा बिहान भुटानको पारोबाट उडेर सीधै पोखरामा अवतरण गर्नेछ । पोखरामा एक घन्टा रोकिएर सीधै पारोतर्फ उड्ने तालिका छ । चार्टर उडानको सफलतापछि ड्रुक एयरले पोखरामा नियमित अन्तर्राष्ट्रिय उडान थाल्ने क्यानका सूचना अधिकारी ज्ञानेन्द्र भुलले बताए । ‘ड्रुक एयरको टिम नै नेपाल आएको थियो, उनीहरूले पारो–पोखरा–पारो उडान गर्न चाहेका छन्,’ उनले भने, ‘चार्टर उडान सफल हुनेबित्तिकै नियमित उडान थाल्ने योजना छ ।’