सान्चोको पतन : उदाउँदो स्टारदेखि क्लबविहीन अवस्थासम्म

अक्टोबर २०१८ मा पहिलो पटक जेडन सान्चोलाई इंग्ल्याण्डको राष्ट्रिय टोलीमा बोलाएपछि ग्यारेथ साउथगेटले भनेका थिए, ‘एक युवा अंग्रेजी खेलाडीका लागि जेडनको कथा असामान्य छ। उनी विदेश गएर हरेक हप्ता ठुलो समर्थकको अगाडि ठुलो क्लबमा खेल्न पर्याप्त साहसी देखिए। यसलाई सम्हाल्ने र उत्कृष्ट प्रदर्शन गर्ने मनोवैज्ञानिक शक्ति उनीसँग छ। त्यहाँ जाने निर्णयले उनको चरित्रबारे धेरै कुरा बताउँछ र त्यो कुरा उनको खेल्ने शैलीमा देख्न सकिन्छ। उनलाई आफूमाथि असाध्यै धेरै विश्वास छ।’

साँच्चै भन्नुपर्दा, एक वर्षअघि मात्र १७ वर्षको उमेरमा म्यानचेस्टर सिटी छाडेर बोरुसिया डर्टमन्ड जाँदा सान्चोले ठुलो जोखिम मोलेका थिए। जर्मनीको जीवनशैलीसँग उनले आफूलाई छिट्टै ढाले। यसैकारण धेरैले उनलाई भावी पुस्ताको उत्कृष्ट खेलाडीका रूपमा हेर्न थालेका थिए।