माउन्ट ब्रोमोमा डढेलो फैलिएपछि इन्डोनेसियामा आगलागी नियन्त्रण प्रयास तीव्र

जकार्ता, २५ साउन । इन्डोनेसियाले देशका विभिन्न क्षेत्रमा फैलिएको डढेलो नियन्त्रणका लागि हेलिकप्टर, सयौँ अग्निनियन्त्रक तथा विपद् व्यवस्थापनकर्मी परिचालन गरेको छ । पूर्वी जाभाको लोकप्रिय ब्रोमो टेङ्गर सेमेरु राष्ट्रिय निकुञ्जमा लागेको डढेलो सबैभन्दा ठूलो रहेको अधिकारीहरूले बताएका छन् । हालसम्म करिब ७४३ हेक्टर क्षेत्रफल जलेको बताइएको छ ।

इन्डोनेसियाको वन मन्त्रालयका अनुसार सुक्खा मौसम तथा एल निनोको प्रभावका कारण देशमा वन तथा जमिनमा डढेलो फैलिने जोखिम बढेको छ ।