नवरात्रको दोस्रो दिन आज माता ब्रह्मचारिणीको पूजा–आराधना गरिँदै

काठमाडौं – बडादसैँअन्तर्गत नवरात्रको दोस्रो दिन आज नवदुर्गामध्ये दोस्रो स्वरूप माता ब्रह्मचारिणीको पूजा–आराधना गरिँदैछ । तपस्या, त्याग, संयम र साधनाको प्रतीक मानिने माता ब्रह्मचारिणीको विधिपूर्वक पूजा गर्नाले भक्तजनमा धैर्य, आत्मबल र सदाचारको विकास हुने धार्मिक विश्वास छ ।

धार्मिक मान्यताअनुसार, ‘ब्रह्म’ शब्दले तपस्या वा ज्ञान र ‘चारिणी’ शब्दले आचरण गर्ने भन्ने अर्थ दिन्छ । त्यसैले तपस्याको मार्गमा हिँड्ने देवीलाई ब्रह्मचारिणी भनिएको हो। माता ब्रह्मचारिणीलाई शान्त, तेजोमय र पवित्र स्वरूपकी देवीका रूपमा वर्णन गरिएको छ। उनको दाहिने हातमा जपमाला र देब्रे हातमा कमण्डलु रहेको हुन्छ। सेतो वस्त्र धारण गर्ने देवीको स्वरूपलाई पवित्रता, शान्ति र सात्त्विकताको प्रतीक मानिन्छ ।