बाँझो जमिनमा आलु र तिते फापर उत्पादन गर्दै जन्तेढुङ्गा

खोटाङ- जन्तेढुङ्गा गाउँपालिकाले बाँझो जमिनलाई उपयोगमा ल्याउँदै कृषि उत्पादन बढाउने र स्थानीय तथा लोपोन्मुख बालीको संरक्षण गर्ने उद्देश्यले उदाहरणीय कार्यक्रम सञ्चालन गरेको छ । गाउँपालिकाले पहिलोपटक करिब ६० रोपनी बाँझो जमिनमा आलुखेती गरी साढे तीन हजार किलोग्राम आलु उत्पादन गरेको हो ।

गाउँपालिकाको आलुखेती प्रवर्द्धन कार्यक्रमअन्तर्गत वडा नं. ४ डम्बर्खु शिवालयस्थित भञ्ज्याङखर्कमा रहेको सार्वजनिक जग्गामा आलुखेती गरिएको थियो । आर्थिक वर्ष २०८२/८३ मा खेर गइरहेको जमिनलाई उपयोग गरी उत्पादन गरिएको आलु अहिले बिक्री भइरहेको गाउँपालिकाले जनाएको छ ।