संघीयतासँगै मुहार फेर्न थालेको छ तल्लो स्वराड क्षेत्र

बैतडी । सदियौंदेखि उपेक्षित बैतडीको तल्लो स्वराड क्षेत्रले संघीयता कार्यान्वयनसँगै थुप्रै प्रगति हासिल गरेको छ । संघीयता कार्यान्वयनको पछिल्लो दशकमा तल्लो स्वराड क्षेत्रले विकास निर्माणका क्षेत्रमा हासिल गरेका कैयौँ उपलब्धिहरु निकै प्रेरणादायी छन् । बैतडी जिल्लाको दक्षिण–पश्चिमी भेगमा पर्ने तल्लो स्वराड क्षेत्र भौगोलिक रूपमा महाकाली नदीसँग जोडिएको सीमावर्ती क्षेत्र हो । वर्तमान प्रशासनिक संरचनाअनुसार तल्लो स्वराड क्षेत्रको मुख्य भूभाग मेलौली नगरपालिका, शिवनाथ र पञ्चेश्वर गाउँपालिकामा समेटिएको छ ।

२०१५ सालको संसदीय निर्वाचनमा डडेल्धुरा जिल्लाबाट तल्लो स्वराडकी नेतृ स्व. द्वारिकादेवी ठकुरानीले निर्वाचन जितेर दक्षिण एसियाकै पहिलो महिला मन्त्री बनेसँगै चर्चा पाएको तल्लो स्वराड क्षेत्रले आफ्नै ऐतिहासिक गाथा बोकेको छ । उसो त तल्लो स्वराड क्षेत्रको मौलिक इतिहास महाकाली नदी, सीमापार आवतजावत, स्थानीय कृषि उत्पादन र भारतका बजारसँगको व्यापारिक सम्बन्धसँग गाँसिएको छ ।