अन्नपूर्ण गाउँपालिकाको विपद् कोषमा एक करोड पाँच लाख जुट्यो, पुनर्निर्माणमा ६६ लाख खर्च

काठमाडौं – मनसुनजन्य बाढीपहिरोबाट प्रभावित क्षेत्रको उद्धार, राहत तथा पुनर्निर्माणका लागि कास्कीको अन्नपूर्ण गाउँपालिकाले स्थापना गरेको विपद् व्यवस्थापन कोषमा एक करोड चार लाख ८५ हजार ४९८ रुपैयाँ सहयोग जुटेको छ । गाउँपालिकाले कोषबाट राहत वितरण र क्षतिग्रस्त संरचनाको मर्मत तथा पुनर्निर्माणमा ६६ लाख ६५ हजार ५४३ रुपैयाँ खर्च गरेको जनाएको छ ।

गाउँपालिका अध्यक्ष विष्णुबहादुर केसीका अनुसार कोषमा पर्यटन व्यवस्थापन समिति, स्थानीय सङ्घसंस्था, व्यवसायी, राजनीतिक दल तथा विभिन्न व्यक्तिबाट सहयोग प्राप्त भएको हो । विपद्बाट प्रभावित नागरिकलाई तत्काल राहत उपलब्ध गराउने र क्षतिग्रस्त संरचनाको मर्मत गर्ने उद्देश्यले गाउँपालिकाले सहयोगका लागि सार्वजनिक आह्वान गरेको थियो ।