प्रस्तावित राजदूत पाण्डे एमाले सांसदहरूको प्रश्न: सीमा विवाद, ईपीजी प्रतिवेदन र व्यापार घाटा समाधानको ठोस योजना के छ?

काठमाडौँ। भारतका निम्ति प्रस्तावित नेपाली राजदूत डा. निश्चलनाथ पाण्डेलाई संसदीय सुनुवाइ समितिमा नेकपा एमालेका सांसदहरूले सीमा विवाद, ईपीजी प्रतिवेदनको भविष्य र चुलिँदो व्यापार घाटा समाधानका ठोस उपायबारे प्रश्न गरेका छन्।

सोमबार सिंहदरबारमा बसेको समितिको बैठकमा आफ्नो कार्ययोजना प्रस्तुत गरेका प्रस्तावित राजदूत पाण्डेलाई सांसदहरूले विगतमा जस्तो कूटनीतिक नोट जारी गर्ने परम्परागत शैलीबाट बाहिर निस्केर नतिजामुखी कूटनीति देखाउन ध्यानाकर्षण गराएका छन्। बैठकमा प्रतिपक्ष दल नेकपा एमालेका सांसदहरूले नेपाल–भारत सम्बन्धका पेचिला र ऐतिहासिक मुद्दाहरू उठाएका हुन्।