कामपाद्वारा फोहोरबाट मल बनाउन शुरू

काठमाडौं । काठमाडौं महानगरपालिकाले फोहोरबाट मल बनाउन शुरू गरेको छ । कामपा वातावरण व्यवस्थापन विभागले नमुनाका रूपमा पहिलो चरणमा १२ टन जैविक फोहोरबाट मल बनाउन शुरू गरेको विभाग प्रमुख रविनमान श्रेष्ठले जानकारी दिनुभयो ।

कामपाले बानेश्वर क्षेत्रबाट ल्याएको जैविक फोहोरबाट पहिलो चरणमा मल उत्पादन शुरू गरेको हो । मल बन्न कम्तीमा पनि दुई महिना लाग्ने अनुमान गरिएको छ । महानगरले सफलतापूर्वक फोहोर उत्पादन गरे सबै वडामा यही विधि लागु गरी फोहोरबाट मल उत्पादन गर्ने तयारी गरेको छ । विभाग प्रमुख श्रेष्ठले भन्नुभयो– ‘केही स्वयंसेवकको समूहले मल बनाउन शुरू गरेको छ । सो समूहले प्रयोग गरेको टेक्नोलोजी सफल भएमा कामपाले व्यावसायिक रूपमै मल उत्पादन गर्ने तयारी गरेको छ ।’ उहाँका अनुसार महानगरले हरेक वडामा फोहोरबाट मल बनाउने तालिम सञ्चालन गरी घरघरमै मल उत्पादन गर्ने योजना अघि बढाइनेछ ।