मनास्लु क्षेत्रका सबै पर्यटक सुरक्षित, चुम उपत्यकाको पदयात्रा स्थगित

बूढीगण्डकी नदीमा आएको बाढीका कारण प्रभावित मनास्लु क्षेत्रको पदयात्रामा रहेका स्वदेशी तथा विदेशी पर्यटकहरू सुरक्षित रहेको मनास्लु संरक्षण क्षेत्र आयोजना (एमक्याप) ले जनाएको छ।

बाढीले पदमार्ग क्षतिग्रस्त बनाएपछि एमक्यापले चुम उपत्यकाको पदयात्रा भने अस्थायी रूपमा स्थगित गरेको छ। चुमनुब्री गाउँपालिका-६ लोक्पास्थित सार्दीभिरमा रहेको क्यान्टिलिभर पुल बाढीले बगाएपछि सो क्षेत्रको आवागमन पूर्ण रूपमा ठप्प भएको हो।