जातीय अतिवाद र धर्मान्तरले मौलिक संस्कृति विघटन उन्मुख : महासचिव पोखरेल

नेकपा एमालेका महासचिव शंकर पोखरेलले सामाजिक सञ्जाल विषाक्तताले भरिँदै गएकाले सकारात्मक चिजले त्यसलाई शुद्धीकरण गर्दै लानुपर्नेमा जोड दिएका छन् । बागमती प्रदेश सम्पर्क कमिटीद्वारा शुक्रबार काठमाडौंमा आयोजित दसैं, तिहार, नेपाल संवत, छठलगायत पर्वहरूको शुभकामना आदानप्रदान तथा सांस्कृतिक कार्यक्रममा उनले त्यस्तो बताएका हुन् ।

‘अचेल अराजक भिडहरूले सामाजिक सञ्जालमा आजकल धेरै नै खराब चिजहरू, अति विषाक्त नकारात्मक सोचहरू फैलाइरहेका छन्,’ उनले भने, ‘त्यसलाई अब रोक्न सक्नुपर्छ ।’ सामाजिक सञ्जाललाई राजमार्गको संज्ञा दिँदै उनले खराब कुराले त्यसलाई अवरुद्ध गरिरहेको उल्लेख गरे । ‘सोसल मिडिया भनेको राजमार्ग हो । त्यो राजमार्गमा खराब चिजहरू हिँडेर ट्राफिक जाम भइरहेको छ । अब असल सोच र चिजहरुले त्यो राजमार्ग कब्जा गर्नुपर्छ ।