यातायात क्षेत्रलाई दिगो र प्रविधिमैत्री बनाउन स्थिर नीति र सहकार्य आवश्यक : अध्यक्ष रितु सिंह वैद्य

काठमाडौं- नेपाल अटोमोबाइल इम्पोर्टर्स एण्ड म्यानुफ्याक्चरर्स एसोसिएसन (नाइमा)की अध्यक्ष रितु सिंह वैद्यले नेपालको यातायात क्षेत्रलाई दिगो, सुरक्षित र प्रविधिमैत्री बनाउन स्थिर सरकारी नीति, आधुनिक पूर्वाधार तथा सरकार–निजी क्षेत्रबीचको सहकार्य आवश्यक रहेको बताएकी छन्।

‘नाइमा नेपाल मोबिलिटी एक्स्पो–२०२६’को उद्घाटन समारोहमा बोल्दै वैद्यले मोबिलिटीलाई सवारीसाधनको प्रयोगमा मात्र सीमित नगरी शिक्षा, स्वास्थ्य, रोजगारी तथा बजारसम्मको पहुँचसँग जोडेर हेर्नुपर्ने बताइन्। यातायात प्रणालीको विकासले आर्थिक गतिविधि विस्तारसँगै नागरिकको जीवनस्तर सुधारमा समेत योगदान गर्ने उनको भनाइ छ।