खर्च घटाउँदै बिक्री बढाउँदै डिडिसी, दैनिक ८ लाख ९१ हजारसम्म नाफा

काठमाडौँ- अतिरिक्त खर्च कटौती, मौज्दात दुग्धजन्य पदार्थको बिक्री र आक्रामक बजारीकरणमार्फत दुग्ध विकास संस्थान (डिडिसी) ले दैनिक नाफा बढाउन थालेको छ।डिडिसीका महाप्रबन्धक डा.शरणकुमार पाण्डेका अनुसार संस्थानले अहिले ४४ जिल्लाका संकलन केन्द्रबाट दैनिक करिब ६१ हजार लिटर दूध संकलन गरिरहेको छ भने दैनिक ८० हजार लिटर दूध बिक्री गरिरहेको छ। बिक्री हुनेमध्ये करिब १९ हजार लिटर दूध विगतमा मौज्दात रहेको दूधबाट व्यवस्थापन भइरहेको छ।

गत वैशाख १८ गते नयाँ व्यवस्थापनले जिम्मेवारी सम्हाल्दा डिडिसीसँग ६०० टन पाउडर दूध र ४५० टन बटर मौज्दात थियो। अहिले पाउडर दूधको मौज्दात १४० टन र बटरको १३५ टनमा झरेको पाण्डेले बताए। मौज्दात घटाउँदै बिक्री बढाउँदा संस्थानको आम्दानीमा सुधार आएको उनको भनाइ छ।