९ क्याम्पसका स्ववियू सभापतिद्वारा त्रिवि पदाधिकारीलाई ध्यानाकर्षण

काठमाडौँ । काठमाडौँमा रहेका ९ वटा क्याम्पसका स्वतन्त्र विद्यार्थी युनियन (स्ववियू)का सभापतिहरूले दलीय विद्यार्थी सङ्गठनका संरचना हटाउन भनी गरिएको पत्राचारप्रति त्रिभुवन विश्वविद्यालयका पदाधिकारीको ध्यानाकर्षण गरेका छन् ।

उनीहरुले आज मङ्गलबार त्रिविका निमित्त उपकुलपति प्रा.डा.सुशील बज्राचार्यसहित पदाधिकारीलाई भेटी त्रिवि विद्यार्थी कल्याण तथा खेलकुद निर्देशनालयले दलीय विद्यार्थी सङ्गठनका संरचना हटाउन भनी गरेको पत्राचारप्रति ध्यानाकर्षण गराएका हुन् । ध्यानाकर्षण पत्रमा भनिएको छ, ‘यो कदम वर्तमान सरकारको अज्ञानताको पराकाष्ठा हो । विश्वविद्यालय ज्ञानको भण्डार र विचार–विमर्श हुने प्राज्ञिक थलो हो । यहाँका वर्तमान पदाधिकारीहरूले सरकारलाई विश्वविद्यालयमा दलीय संरचना नरहेको यथार्थ जानकारी गराउन नसक्नुले विश्वविद्यालय अब स्वायत्त रहेन भन्ने कुरा स्पष्ट हुन्छ। प्राज्ञिक स्वतन्त्रता र प्रशासनिक स्वायत्तता विश्वविद्यालयका दुई मुख्य आधार स्तम्भ हुनुपर्नेमा पछिल्लो समय विश्वविद्यालय सरकारको छाया बन्न पुगेकोप्रति हामी गम्भीर खेद प्रकट गर्दछौँ ।’