कसले रोक्ला अर्जेन्टिनाको गतिलाई !

दोहा । ४० महिना भइसक्यो, अर्जेन्टिनाले सिनियर अन्तर्राष्ट्रिय फुटबलमा एउटा पनि खेल हारेको छैन । यसबीचमा ८/१० वा १५/२० हैन, ३५ खेल खेलिसकेको छ । सन् २०१९ को जुलाई ३ तारिखमा भएको कोपा अमेरिका सेमिफाइनलमा ब्राजिलसँग २-० गोलले पराजित भएयता अर्जेन्टिनाले एक खेल पनि हारेको छैन । यसबीचमा १० खेल बराबरी खेलेको छ । एक खेल टाइब्रेकरमा जितेको थियो ।

अबका तीन खेल पनि नहारे अर्जेन्टिना सिनियर अन्तर्राष्ट्रियमा लगातार सर्वाधिक खेल नहार्ने विश्व कीर्तिमान बनाउन सफल हुनेछ । त्यो अवस्थामा इटालीको नाममा एक वर्षअघि बनेको कीर्तिमान तोडिनेछ । इटालीले लगातार ३७ खेलसम्म नहारेर विश्व कीर्तिमान बनाएको थियो ।