चाडपर्वमा महँगीको मार

दशैँ–तिहारमा खुशी बाँडिनुपर्ने हो, महँगीको भार होइन । तर हरेक वर्ष चाडपर्व नजिकिएसँगै खाद्यान्न तथा दैनिक उपभोग्य वस्तुको मूल्य बढ्ने र सरकार अनुगमनमा सीमित हुने प्रवृत्ति दोहोरिँदै आएको छ । यसपटक पनि खसीको मासु, अण्डा, चामल, दाल, चिउरालगायत वस्तुको मूल्य बढेको छ । चाडपर्वमा माग बढ्छ भन्ने जान्दाजान्दै बजारलाई व्यवस्थित गर्न नसक्नु सरकारको कमजोरी हो ।

दशैँमा उच्च खपत हुने खसीको मासु अहिले प्रतिकिलो १ हजार ६ सय ५० रुपैयाँ पुगेको छ भने अण्डाको मूल्य प्रतिक्यारेट ६ सय रुपैयाँ पुगेको छ । पछिल्लो डेढ महिनामै कतिपय खाद्यान्न प्रतिकिलो ५ देखि ३० रुपैयाँसम्म महँगिएका छन् । आम्दानी नबढ्ने तर खर्च बढ्ने अवस्थाले न्यून तथा मध्यम आय भएका परिवारलाई थप मार परेको छ । यसले ऋण र उपभोगको जोखिम पनि बढाएको छ । अनेक प्राकृतिक विपत्तिको मारमा परेकाहरुको नजरमा दशैँमा बजारभाउ महँगीले अझ थप समस्या थप्ने निश्चित छ ।