यूएईविरुद्ध नेपाललाई जितको विकल्प छैन 

काठमाडौं । पछिल्लो समय अविश्सनीय प्रदर्शन गरिरहेको नेपाली राष्ट्रिय क्रिकेट टोलीले बिहीबार आईसीसी क्रिकेट विश्वकप लिग–२ को अन्तिम खेलमा युनाइटेड अरब इमिरेट्स (यूएई)सँग प्रतिस्पर्धा गर्नेछ ।

कीर्तिपुरस्थित त्रिवि क्रिकेट मैदानमा यूएईविरुद्ध प्रतिस्पर्धा गर्दा नेपाललाई जितको विकल्प छैन । किनकि, आईसीसी क्रिकेट विश्वकप लिग–२ का शीर्ष तीन टिमले मात्र जिम्बाब्वेमा आउँदो जुन १८ देखि जुलाई ९ सम्म हुने एकदिवसीय विश्वकप–२०२३ को छनोट प्रतियोगितामा स्थान बनाउनेछन् । बाँकी चार टिमले नामिबियामा मार्च २४ देखि अप्रिल ४ सम्म हुने आईसीसी क्रिकेट विश्वकप क्वालिफायर प्लेअफ खेल्नेछन् ।